CROSS TRAINING EN DINSDAE

Die tema die maand is glo cross training. Nee dis nie iets wat in die kerk gebeur nie, laat ek verduidelik (en dan voeg ek my eie tematjie oor Dinsdae by).
Lank, lank gelede toe julle nog klein was en ek begin fietsry het, was ons cross training om baanfiets te ry in die somer na ’n winter van padfietsresiese. Of om padfiets te ry na ’n somer van baanfietsresiese (hang af of jy vinnig of lig was). In daai tyd sou daar gefrons geword het indien jy dit sou waag om te gaan stap, swem, of enigiets anders as fietsry te doen, want dit sou jou glo ’n stadiger fietsryer maak. Aan die einde van die tagtigerjare toe ons bergfietse ontdek het, was dit ons cross training. So in meeste van my fietsryloopbaan was cross training maar net ’n ander dissipline van fietsry. Natuurlik het die ouens in ’n Desember-vakansie ’n paar biere gedrink en op die strand rondgelê, wat dan hulle cross training was. Die cross training storie kan of regdeur die jaar op bv. ’n Maandag gebeur as jysou gaan swem of stap om jou liggaam en kop te rus voor nog ’n week se lekker harde oefenry of dit kan oor ’n vakansie plaasvind waar jy jou fiets by die huis los.
Daar is twee redes waarom daar iets soos cross training is: die een is om ander spiere te oefen as wat jy deur die jaar doen met fietsry, maar die ander belangriker rede glo ek is om ’n break te vat, om iets anders te doen, om jou kop skoon te kry na ’n lang seisoen waar jy nie meer ’n fiets wil sien en goed gatvol is. So ek wil cross training, wat die maand se tema is ’n ander naam gee. Kom ons noem dit net “doen iets anders”. Dit sluit in ’n bier of twee, ’n staptog of bergklim met goeie vriende, gaan verf jou huis of werk in jou tuin, ’n winter ski-vakansie of enigiets anders wat jou kop wegvat van wat jy deur die jaar moes doen. En met meeste van die aktiwiteite wat ek genoem het oefen jy wel ander spiere as gewoonlik, maar belangriker is dat jou kop skoon kom en jy beide jou liggaam en kop ’n breek gee. Erik Kleinhans braai en klim berg vir cross training, Sauser gaan terug Switserland toe om te gaan ski in Desember; so kry die aktiwiteit wat jou gaan laat voel jy vat ’n break. En spandeer natuurlik tyd met jou familie en vriende wat deur die jaar met jou sit wat altyd half moeg is, nie laat kan bly nie en nooit op ’n naweek beskikbaar is vir iets anders as lang fietsry nie. Dis ook die tyd om ’n bietjie gewig op te tel sodat jy darem weer ’n paar lekker doelwitte kan hê in die nuwe jaar. Jy kan natuurlik ook gaan fietsry as cross training. Ouens soos Erik klim byvoorbeeld op hul fietse in Stellenbosch en soek die agterste weggesteekte grondpaadjies tot by sy ma-hulle se huis in George. Dan word daar lekker stadig gery, gestop langs die pad, nonsens gesels om ’n kampvuur in die aande. Dit is ook fietsry maar weereens, jou kop kry ’n break, jy “oefen” nie, jy ry net en neuk rond terwyl jy in die aande jou elmboogspiere oefen. En terwyl jy nou bietjie tyd het, bring dit by my volgende punt. TUE is nie n afkorting vir Dinsdag in Engels nie!
Die resiesperde onder julle kan ook tydens die vakansie Drugfree Sport en WADA se nuwe lyste van medisyne met verbode middels in deurgaan sodat julle nie ook gevang word met ’n hoesmedisyne wat jou dokter-pel glo vir jou voorgeskryf het nie. En terwyl jy op die strand lê, lees bietjie van die reëls oor die neem van medisyne asseblief. As jy gevang word is jy of dom of skelm. Almal pleit natuurlik dom, hulle dink mos TUE staan vir Dinsdag in Engels. Nee mense, as jy siek is kan jy nie ry nie. Of as jy glo jy kan ry met die kondisie waarvoor jy die pille vat, het die goed verbode middels in of dit het nie. Dis mos maklik. Indien dit verbode middels inhet kan jy nie gaan deelneem alvorens jy toestemming het van die drugmense om daarmee deel te neem nie. Dis waarvoor die Dinsdag-storie staan. En as hulle nie wil hê jy moet daarmee deelneem nie, want dit gaan jou soos Wiggo laat ry, moet jy of medisyne verander, gesond word of nie deelneem nie. Moet nou nie lat ons in 2017 weer probleme hê nie, asseblief.

Leave a Comment

Your email address will not be published. Required fields are marked *

*